വിചിത്ര നിരീക്ഷണവുമായി ചൈന. ആണ്‍കുട്ടികള്‍ക്ക് സ്ത്രൈണത കൂടുന്നുവെന്ന വാദമാണ് ഇപ്പോള്‍ ചൈനീസ് വിദ്യാഭ്യാസ മന്ത്രാലയം ഉന്നയിച്ചിരിക്കുന്നത്.
ഈ പ്രശ്‌നം പരിഹരിക്കുന്നതിനായി പ്രത്യേക പദ്ധതിയും ആരംഭിച്ചു കഴിഞ്ഞു. യുദ്ധ വീരന്മാരെ പോലെ ശക്തരും കായികബലവുമുള്ളവരുമായി യുവാക്കളെ മാറ്റുകയാണ് സര്‍ക്കാരിന്റെ ലക്ഷ്യം. ഇതുസംബന്ധിച്ച് ബിബിസിയുടെ റിപ്പോര്‍ട്ട് പുറത്തുവന്നിരിക്കുകയാണ്.
ആണ്‍കുട്ടികളുടെ പൗരുഷം വര്‍ധിപ്പിക്കാന്‍ കായിക വിദ്യാഭ്യാസം പരിഷ്‌ക്കരിക്കണമെന്നും ഫിസിക്കല്‍ എജ്യുക്കേഷന്‍ അധ്യാപകരുടെ നിയമനം ശക്തിപ്പെടുത്തണമെന്നും സര്‍ക്കുലര്‍ നിര്‍ദ്ദേശിക്കുന്നു.
കായിക പശ്ചാത്തലമുള്ളവരെയും വിരമിച്ച അത്ലറ്റുകളെയും അധ്യാപകരായി നിയമിക്കണമെന്നും ഫുട്ബോള്‍ പോലുള്ള കായിക ഇനങ്ങളോടുള്ള തീവ്രമായ അഭിരുചി കുട്ടികള്‍ക്കിടയില്‍ വളര്‍ത്തണമെന്നും സര്‍ക്കുലര്‍ കൂട്ടിച്ചേര്‍ക്കുന്നു.
ചൈനയിലെ യുവാക്കളില്‍ സ്ത്രൈണത വര്‍ധിച്ചു വരികയാണെന്നും ഇത് ഫലപ്രദമായി കൈകാര്യം ചെയ്തില്ലെങ്കില്‍ രാജ്യത്തിന്റെ നിലനില്‍പ്പ് തന്നെ അവതാളത്തിലാകുമെന്നും ചൈനയിലെ ഉന്നതാധികാര ഉപദേശക സമിതിയംഗമായ സി സെഫു വിമര്‍ശിച്ചിരുന്നു.
വീട്ടിലെ ചുറ്റുപാടുകളാണ് ഇതിന് കാരണമെന്നും അമ്മമാരും അമ്മൂമ്മമാരും വളര്‍ത്തുന്ന ചൈനീസ് ആണ്‍കുട്ടികള്‍ക്ക് സ്ത്രൈണത കൂടുതലാണെന്നും സി സെഫു കുറ്റപ്പെടുത്തുന്നു. എന്നാല്‍ സര്‍ക്കാരിന്റെ ഈ നീക്കത്തിനെതിരേ സാമൂഹിക മാധ്യമങ്ങളില്‍ വന്‍ വിമര്‍ശനമാണുയരുന്നത്. സ്ത്രൈണത മോശം കാര്യമല്ലെന്നും തികച്ചും മാനുഷികമാണെന്നും ആളുകള്‍ പറയുന്നു.
